Kato Bundo Dari Kampuang Untuak anak Nan di Rantau

Kato Bundo Dari Kampuang Untuak anak Nan di Rantau

Oi Nak kanduang sibiran tulang, buah hati limpo bakuruang, ubek jariah palarai damam, sidingin tampa di kapalo, dima kini nak? 

Lah tibo bulan puaso Sabanta lay hari ka rayo Pangana jauah diputiah mato Maingek nak kanduang di tanah jawo.. 
Ndak ado kaba ciek pun barito Mandeh manunggu jo ati ibo Apo lah lupo jo mandeh kanduang nak? Ibo hati mandeh nak.. :'( Kalau diliek dipandangi nak, dicaliak umua nan tapakai, badan Mandeh baransua tuo. 

 Nyampang tibo saruan Allah, aja sampai angok malayang. Ditanah sirah badan tabujua, kain kafan panyalimuik dingin, batu nisan nan tandonyo.. 

 Apo harus jo takdir kematian tu manyilau mandeh nak? Pulang juo lah nak.. Silau lah Mandeh walau sabanta.. Oh nak kanduang dirantau urang Jikok rami galeh takambang Galak gadang ati pun sanang Tapi jan lupo sawah jo pimatang Ndak elok dipaturuikkan ati gadang Ingek kabun sarato ladang Tampek mandeh bakureh mambantiang tulang.. 
 Ndak Mandeh harok ameh jo parmato doh nak.. 

Nan mandeh taragak hanyo badan diri nak.. Nan ka mambuek batin ko pueh katiko babimbiang tangan karipuik mandeh ko pai Sumbayang Rayo.. Hanyo itu nak.. Hanyo itu.. :'( :'( .. Takalo maso dulunyo nak, awal mulonyo insan kalahia, Mandeh di dalam pasawangan, sakik nan indak tatahankan, pakiak mamacah haniang malam . Lua ka Allah, bagantuang indak kamano ka manggapai. Dek lamo lambek badayuang, sapueh-pueh panangguangan sampailah juo di kualo. 

Tali turun sauh dibuang, kapa marapek di tapian balabuah surang pasisianyo. Sawajah kapado urang nantun nak, mandi darah sakujua badan, kaki malajang-lajang­, taganggam tangan nan duo, bunyi pakiak sapanuah kampuang cando pandeka dapek lawan. O.. Nak.., akhianyo lahia juo ka dunia.. 

Bangga nan ndak dapek dikatokan.. Bahagia nan bukan alang kapalang.. Sakik jo padiah baganti sanang.. Taingek carito lamo.. Katiko anak malangkah ka rantau urang.. Jo linangan aia mato mandeh lapeh.. Tangih nan capek basuruakkan.. 

Do'a nan tiok hari basimpuahkan.. Hanyo itu nan mandeh kana nak.. Bukan harok dek baleh jaso nak.. Karano itu kewajiban mandeh.. 
 Tapi baa dek mandeh sabuik sadonyo nak? Karano hanyo itu untuak kini ko nan bisa marintang rusuah.. Mailangkan ibo hati.. Mandaru kapa tabang dilangik nak.. Manapi kapa lauik dipantai.. Lah lalu lalang pulo Oto dari jauah.. Balinang aia mato Mandeh mamandangnyo.. 

Baharok kok lain nan datang.. 

Kironyo indak juo doh nak, hanyo angan-angan pamenan kapalo, rindu nan alun ado ubeknyo.. :'

( NB liak: manabuang lah dari kini sanak, usahon juo lah pulang, jan sampai mandeh baibo hati.. Selamat menyambut hari raya Idulfitri


Post Populer

Copyright © Kamus Padang. All rights reserved.